Er du skuleelev og skal skriva om Anders Totland eller bøkene hans? Her er ein bloggpost med svar på alt du lurer på, eller i alle fall alt du kjem til å få svar på.
Anders Totland (1986) debuterte hausten 2015 med boka Vampyrane i Eplehagen. Boka er gjeven ut på Kapabel Forlag, og er illustrert av Nina Flatnes Bratbak.
Våren 2016 kom han ut med ungdomsromanen Engel i snøen på Gyldendal Norsk Forlag. Boka hausta svært gode kritikkar, og fekk tildelt Nynorsk barnelitteraturpris.
I tillegg har han bidrege med ein av tekstane til antologien Fantasiboka, som kom ut på Skald forlag hausten 2016. Det er den femte og siste boka i serien av nye, nynorske forteljingar for born, som er gjennomillusertrert av Gunvor Rasmussen.
Hausten 2017 kom Totland ut med si andre ungdomsbok, Så lenge ingen ser oss, og debuterte på same tid som kokebokforfattar med boka Digg på Skald.
Den første sakprosaboka for barn og unge, Den norske slavehandelen, kom ut på Gyldendal hausten 2018, og blei nominert til Kulturdepartementet sin fagbokpris. Kort tid etter kom den tredje ungdomsromanen, Nedteljing.
Hausten 2019 kom tre nye bøker på rappen: Sakprosaboka Nattmannen, biletboka Ut i rommet og romanen Vintertonar, som er Totland sin debut som vaksenbokforfattar.
Våren 2020 kom sakprosaboka Lepra, og i februar 2021 kom den første sakprosaboka for vaksne. Boka handlar om den store motstanden mot vindkraft i norsk natur, som har vakse fram dei siste åra. Tittelen er Vindmøllekampen – historia om eit folkeopprør.
Ungdomsromanen Blindsone kom ut i 2021. Det same gjorde sakprosaboka Pest og plage. Den femte sakprosaboka for ungdom, Norske sjørøvarar, kom ut i august 2022.
Og i september kom Til jord skal du bli, som er ein roman for vaksne. Allereie den første veka gjekk boka inn på Bokhandlerforenings bestseljarliste, og blei selt til Danmark. Boka skal òg filmatiserast.
Av 15 bøker er så langt tre av ungdomsromanane omsett til dansk, i tillegg til vaksenromanen Til jord skal du bli. Rettane til barneboka Ut i rommet er selt til Færøyane.
Under den første koronanedstenginga i 2020 laga Totland ein serie med korte formidlingsfilmar under vignetten Faktisk frukost, som alle ligg tilgjengeleg på Youtube.
Sidan sommaren 2021 har han vore engasjert av Det norske bibelselskap som del av ei større gruppe som jobbar med å omsetja og skriva ei lettlest utgåve av Det nye testamentet.
Totland er utdanna kokk, har store deler av livet vikariert som organist, og jobba tidlegare som journalist i avisa Sunnhordland. I nokre år skreiv han om matauk på bloggen Frå hage til mage, men no deler han stort sett berre bilete av restaurantmiddagar på Instagram.
Totland er ein aktiv formidlar, og reiser mykje rundt på besøk til skular, bibliotek og festivalar. Alle sakprosabøkene dannar grunnlag for foredrag om dei ulike emna. Ta gjerne kontakt på totlanders@gmail.com om du er interessert.
Har du lyst på oppdateringar frå forfattarlivet, og kanskje eit godt tilbod innimellom, kan du abonnera på dette nyhendebrevet:
ANDERS TOTLAND 